Ég er fædd 8. apríl 2007, ég var 3920 gr og 52 cm, höfuðmál mitt var 37 cm, ég er með blá augu og fæddist með rauðanblæ í hárinu en hann er frekar svona ljós gylltur. Ég var ekkert að flýta mér í heiminn frekar en stóra systir mín og lét bíða eftir mér í ½ mánuð, ég átti að fæðast 25. mars en fæddist ekki fyrr en 8. apríl og þá var ég nú eins og systa enn á þeirri skoðun að það væri bara best að kúra enn inn í henni mömmu minni, en ég var látin fæðast í gangsetningu og var komin í heiminn á svipuðum tíma og systir mín eða 16:12.

---

Þóra: er kvenmynd karlmannsnafnsins Þór og merkir Þrumuguðinn einn af Ásum

Arna: er kvenmynd nafnsins Örn og merkir fugl.

---

Barn í hrútsmerki.
(21. mars til 19. apríl)

Barn í hrútsmerki er algjör orkubolti, sem þú sérð skjótast hingað og þangað og er alltaf að. VÁ! Vonum bara að þú náir að fylgja því eftir. Þetta barn er frumkvöðull að eðlisfari og elskar að prófa og kanna og býr yfir mikilli orku. Athafnir eftir skóla eru algjör nauðsyn fyrir þetta barn, t.d. íþróttir og útivera. Íþróttir eru í raun mjög góður kostur fyrir hrútinn því að þetta eru yfirleitt kappsfullir einstaklingar að eðlisfari. Þar sem börn í hrútsmerki eru hvatvís þá eru þessi börn oft svolítið erfið fyrir kennarann að höndla og getur verið erfitt að hafa mörg börn í bekknum sem eru í hrútsmerkinu. Hrúturinn er alltaf að prófa eitthvað nýtt og er hugrakkur og er því ávallt með marbletti og skeinur eftir klifur í trjám eða öðru slíku. Það er ljóst að barn í hrútsmerkinu er ekki fyrir hjartveika foreldra. Mikilvægt er að barnið upplifi sig sjálfstætt og ef þú ert að passa upp á það skaltu reyna komast hjá því að það sjái það. Þetta barn vill gera allt sjálft. Að lokum, barn í hrútnum veit ekki hvað það er að hægja á sér, svo að það er betra fyrir þig að venjast snöggum hreyfingum. Gott að fylgjast með sykurinntekt þessara barna og hafa í lágmarki, því trúðu mér þessi börn hafa næga orku fyrir.

Ég fæddist 2.mars 1998, ég var 4170 grömm og 52 cm, höfuðmál mitt var 37 cm, ég er með blá augu og rauðleitt hár. Ég var sko ekkert að flýta mér í heiminn og lét bíða eftir mér í hálfan mánuð, ég átti að fæðast 14. feb en fæddist ekki fyrr en 2. mars og þá var ég nú enn á þeirri skoðun að það væri bara best að kúra inní henni mömmu minni, en ég varð að fæðast og læknarnir settu upp dripp hjá mömmu og ég var komin í heimin innan tveggja tíma, ég er fædd kl 15:54.

--

Guðbjörg: nafn þetta er myndað af forliðnum "Guð" sem merkir guð, - goð og viðliðnum "björg" sem merkir hjálp.

Elsa: nafn þetta er að uppruna stytting á nafninu Elísabet.

----

FISKARNIR

19. febrúar - 20. mars

Hið dæmigerða fiskabarn er yfirleitt hæfileikaríkt og vel gefið en viðkvæmt og ekki ólíklegt að það missi stjórn á tilfinningum sínum og bresti í grát af engri sjáanlegri ástæðu. Fiskar eru gjarnir á að fórna sér fyrir aðra. Mikilvægt er að fara varlega að fiskunum og varast að særa tilfinningar þeirra með vanhugsuðum orðum. Fiskar eru mjög skapandi og þeir geta skapað sinn eigin heim þar sem þeir finna til öryggis þegar hinn harði heimur reynist þeim ofviða þá flýja þeir inn í sinn eigin. Því er mikilvægt að hvetja litla fiskinn til að koma út úr skel sinni og takast á við lífið, hvetja hann til að segja skoðun sína hreint út. Foreldrar ættu einnig að hlúa að listrænum hæfileikum barnsins ef þeir koma fram. Fiskurinn er í eðli sínu vingjarnlegur og skilningsríkur en jafnframt umburðarlyndur. Hann á t.d. erfitt með að trúa nokkru misjöfnu um aðra og er því alltaf jákvæður í fyrstu gagnvart ókunnugum.